نصائح منوعة

⭐️ الغسول لو اول مرة تعملي روتين او اول مرة تستخدمي غسول طبي اصلاً لازم هيطلع حبوب لان انتِ الدهون بتاعت البشرة موجودة تحت الجلد الميت بس مش بتطلع ف اول مرة تستخدمي لازم هتطلع حبوب ( هنا مش هنغير الغسول غير لو حصل اي حاجة جديدة ) .

⭐️ الغسول بيستخدم مرتين فاليوم لو الغسول مش بيعملك جفاف سواء كنت بشرة جافة/مختلطة/دهنية
و لو بيعمل يبقى يوم و يوم و تستخدمي الايام التانية اي صابون طبي من غير ريحة زي ليت اب ، جليسرين ، فحم و الخ .
لو محتاجة تغسلي وشك اكتر من مرتين ممكن تنضفي بشرتك ب ميسلار وتر بعدها تغسلي وشك بمية بس من غير اي غسول.
⭐️ التونر و الميسلار مش حاجة واحدة و لا ليهم علاقة ببعض  الميسلار اول ما اخترع اتعمل عشان ازالة الميك اب بعدها اتعمل لتنضيف البشرة و المسام من الشوائب ، طيب و التونر؟ معمول عشان يرجع توازن ph البشرة و هو 5.5 اللي معظم الغسولات بتلعب فيه و كمان اهم مكوناته الكحول و ده اللي بيديله الباور بتاع تنضيف المسام و قبضها بعد فتح المسام بالغسولات و الماسك و مش لازم يستخدم كل يوم .

⭐️ الاسكراب مهم جداً حتى لو مرة فالاسبوع ( مفروض مرتين ) عشان بيشيل طبقة جلد ميت بتخلي معظم المنتجات اللي بتستخدميها من ترطيب و غيره ميعملش الوظيفة الاساسية ليه .

⭐️ الشيت ماسك مش بيعمل حاجة غير الترطيب متعتمديش انه هيحسن الحبوب و المسام و مشاكل البشرة الاخرى .

⭐️ لازم من ٣-٤ ايام فالاسبوع ماسكات من ماسكات جاهزة لمسكات طبيعية اهم حاجة انعشي بشرتك .

⭐️ الزيوت الطبيعية للبشرة سواء ف حمام البخار او فالمسكات بتكون حلوة جداً حتى لو بشرة دهنية ( اصلنا بنستخدم نقط مش الازازة كلها ).

⭐️ قلة الترطيب اصل مشاكل كتير جداً فالبشرة لازم تختاري مرطب مناسب ليكِ ومتنسيش الترطيب والبشرة الدهنية زيها زي البشره الجافة.
الترطيب اساس عشان تمنعي ظهور الخطوط الرفيعة و التصبغات و غيرها من المشاكل .

⭐️ كتر الاسكرابات و الماسكات غلط و اكبر غلط لان كدا انتي بتهلكي بشرتك مش بتنفعيها خالص ، و الاسكرابات بتعمل زيادة ف حجم المسام و بتزود افراز الدهون ف كل حاجة بالعقل حلوة .

⭐️ الڤازلين ممكن نستخدمه ف ترطيب الشفايف، الرجل و بالذات المشققة لكن لا ينصح بستخدامه على البشرة او الايد استبدليه فالبشرة ب اي كريم مرطب حتى لو بانثينول و موندو كبدائل رخيصة ، و استبدليه فالايد ب اي كريمات ايد حتى لو جونسون و نيڤيا بلاش نكتم المسامية بتاعت البشرة .

⭐️ اكبر سبب ف تفتيح المناطق الغامقة هما التقشير بالاسكراب و بعديه الترطيب للمنطقة المراد تفتيحها .

⭐️ معجون الأسنان بيغمق الشفايف و حواليها لازم نغسل المنطقة دي كويس و نرطب الشفايف بعد غسل الاسنان .

⭐️ كريم النهار للنهار و كريم الليل لليل ، متحطيش ده مكان ده و ده مكان ده ، كريم النهار بيكون معمول بخاصية spf حتى لو خفيفة المهم انه في معامل حماية من الشمس + الترطيب ، اما كريمات الليل ف معظمها بيكون اساسه الترطيب و النضارة .

⭐️ بلاش نستخدم ماركات مجهولة المصدر سواء فالعناية بالبشرة او الشعر او الميك اب لانها تعتبر بمثابة قنبلة موقوتة هتنفجر ف وشك ف يوم من الايام و اتحملي بقى تبعيتها .

⭐️ مساج الوش كفيل يخلي بشرتك تتحسن لو داومتي على تدليكها بعد استخدام الكريم او السيرم المرطب .

⭐️ قبل ما تستخدمي اي منتج دوري على المكونات ingredient بتاعته بعدها قرري لو هتستخدميه او لا ، لو مش بتفهمي فالمكونات هتنفع معاكي او لا و كدا كدا جيبتي المنتج اعملي اختبار حساسية على منطقة زي اسفل الدقن او الايد و سبيها ٢٤ ساعة لو محصلش حاجة انتِ كدا فلة استخدميه بقى .

⭐️ لما تتشفي وشك بلاش عنف براحة على وشك ، كمان فرشة الوش ممكن تستخدميها ٣ مرات فالاسبوع ، طيب باقي الاسبوع استخدمي فوريو او سيليكون .

⭐️ الشعر مش بيتسرح و هو مبلول عشان هيتكسر و مش بيتحط عليه اي كريمات او سيرم غير لما يجف .

⭐️ الشعر بيتسرح من تحت لفوق منعاً للتساقط و يفضل استخدام فرش خشب لو مش متوفرة استخدمي العادية بس بلاش تسريح بعنف برده .

⭐️ البلسم بيتحط على اطراف الشعر مش الفروة خالص خالص .