الحمام المغربي من الحاجات القديمة جدا اللي كانت من ايام جداتنا وكان بيتعمل في الحمامات الشعبية لانه كان هو يعتبر بديل ال Spa اللي موجود دلوقتي لكن حاليا رجع الحمام المغربي تاني وبيتعمل في ال Spa وده لان ليه فوايد كتير جدا للبشرة والجسم
وأصبح دلوقتي من الحاجات الاساسية لكل عروسة قبل ليلة الفرح بس المشكلة ان في بنات كتير مش بيحبوا فكرة انهم يعملوا الحمام المغربي بره البيت ده غير انه بيكون غالي جدا في مراكز التجميل عشان كده هنزل لكل البنات طريقة الحمام المغربي في البيت والنتيجة ممتازة
المكونات والادوات اللي محتاجينها عشان نعمل الحمام المغربي في البيت:
1- الصابون المغربي.
2- الطمي المغربي
3- مية الورد.
4- الليفة المغربية الخشنة.
5- الحجر الخفاف.
نيجي دلوقتي لطريقة عمل الحمام المغربي:
1- اول حاجة قبل ما تبدأي تكوني قافلة شباك الحمام كويس عشان نحبس البخار جوه الحمام ومسام الجسم تتفتح ويجيب النتيجة المطلوبة.
2- املي البانيو بمية سخنة بالدرجة اللي جسمك يتحملها والحمام كله يتملي بخار واقعدي فيها لمدة متقلش عن عشر دقايق عشان تفتحي مسام الجسم كويس.
3- ادهني جسمك ووشك كله بالصابون المغربي وسيبيه على البشرة لمدة ربع ساعة.
4- دلوقتي هنفرك الجسم بالليفة المغربية الخشنة كويس بحركات دائرية من تحت لفوق عشان ننشط الدورة الدموية ونشيل الجلد الميت ونقشر البشرة وننضفها
وانتي بتفركي الجسم ركزي على المناطق الغامقة في الجسم والمناطق الخشنة زي الكوعين والركبتين وبالنسبة للوش ممكن نفركه بسفنجة ناعمة بحركات دائرية بالراحة جدا من غير فرك قوي او ضغط على البشرة
متفركيش الوش ابدا بالليفة الخشنة لان ده هيضر البشرة خلي الليفة الخشنة للجسم بس.
5- بعد عملية التنضيف والتقشير دي هنعمل ماسك للجسم كله من الطمي المغربي باننا هناخد من الطمي وندهن بيه الجسم كله ونسيبه لحد ما ينشف وبعد كده نفركه كويس من على جسمنا ونغسله بالمية السخنة وانتي مستنية الماسك ينشف على جسمك ممكن تستغلي الوقت ده بانك تفركي كعوب رجلك بالحجر الخفاف عشان نتخلص من الخشونة ومن كل الجلد الميت.
6- اخر خطوة هنقفل مسام البشرة باننا هنغسل جسمنا بمية باردة وممكن في الاخر بعد ما ننشف جسمنا ندهنة بقطنة فيها مية ورد عشان مية الورد بتساعد على قفل مسام البشرة وكمان هتدي انتعاش وريحة حلوة لجسمنا.
والحمام المغربي ممكن في البداية يتكرر كل اسبوع لمدة شهرين وبعد كده ممكن لما مشاكل جسمك تخف شويه تعمليه كل شهر مره
تمام كده هنعمل حمام مغربي مره ف الشهر
طب كل أسبوع بقي هنعمل ايه؟
هتعملي اسكراب قهوه وعسل وزبادي وليمون تخلطيهم سوا وتفركي جسمك كويس وخصوصا ركبتك .
بعد كده تشطفي وتحطي ماسك الرز وتسيبيه ينشف علي جسمك وبعدين تفركيه وبعدين تشطفي وبعدين تنشفي وتدهني مرطب .
طب تمام هنعمل ايه كل يوم بقي؟
هنرطب جسمنا قبل النوم بقشطه الاميرات او حليب جوز هند او زبده شيا او زبده ليمون .
ليست هناك تعليقات